ਮਲੇਸ਼ੀਆ ਦੇ ਸਬਾਹ ਵਿਚ ਅੱਗ ਲੱਗਣ ਕਾਰਨ 1,000 ਘਰ ਸੜ ਕੇ ਸੁਆਹ; ਹਜ਼ਾਰਾਂ ਲੋਕ ਬੇਘਰ

2 hours 1 minutes ago

ਕੋਟਾ ਕਿਨਾਬਾਲੂ, 19 ਅਪ੍ਰੈਲ - ਅੱਜ ਸਵੇਰੇ ਸੰਦਾਕਨ ਦੇ ਕੰਪੁੰਗ ਬਹਾਗੀਆ ਵਿਚ 1,000 ਘਰਾਂ ਨੂੰ ਅਗ ਨੇ ਤਬਾਹ ਕਰ ਦਿੱਤਾ , ਜਿਸ ਨੇ ਪੂਰੇ ਦੇਸ਼ ਨੂੰ ਦੁਖੀ ਕੀਤਾ ਹੈ। ਪ੍ਰਧਾਨ ਮੰਤਰੀ ਵਿਭਾਗ (ਸਬਾਹ ਅਤੇ ਸਾਰਾਵਾਕ ਮਾਮਲੇ) ਦੇ ਮੰਤਰੀ, ਦਾਤੁਕ ਮੁਸਤਫਾ ਸਕਮੂਦ ਨੇ ਕਿਹਾ ਕਿ ਮਲੇਸ਼ੀਅਨ ਸਿਵਲ ਡਿਫੈਂਸ ਫੋਰਸ ਅਤੇ ਹੋਰ ਸੰਬੰਧਿਤ ਏਜੰਸੀਆਂ ਨੂੰ ਪ੍ਰਭਾਵਿਤ ਲੋਕਾਂ ਦੀ ਸਹਾਇਤਾ ਲਈ ਤੁਰੰਤ ਘਟਨਾ ਸਥਾਨ 'ਤੇ ਤਾਇਨਾਤ ਕੀਤਾ ਗਿਆ ਸੀ।

ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੇ ਕਾਰਜਾਂ ਵਿਚ ਅਸਥਾਈ ਆਸਰਾ ਸਥਾਨਾਂ 'ਤੇ ਬਚਾਅ, ਨਿਕਾਸੀ, ਰਜਿਸਟ੍ਰੇਸ਼ਨ ਅਤੇ ਸ਼ੁਰੂਆਤੀ ਸਹਾਇਤਾ ਸ਼ਾਮਿਲ ਹੈ।ਆਫ਼ਤ 'ਤੇ ਦੁੱਖ ਪ੍ਰਗਟ ਕਰਦੇ ਹੋਏ, ਮੁਸਤਫਾ ਨੇ ਕਿਹਾ ਕਿ ਸਾਰੇ ਮਲੇਸ਼ੀਅਨ ਕੰਪੁੰਗ ਬਹਾਗੀਆ ਨਿਵਾਸੀਆਂ ਦੁਆਰਾ ਮਹਿਸੂਸ ਕੀਤੇ ਗਏ ਦਰਦ ਨੂੰ ਸਾਂਝਾ ਕਰਦੇ ਹਨ। ਇਹ ਹਾਦਸਾ ਸਬਾਹ ਦੇ ਇਕ 'ਵਾਟਰ ਵਿਲੇਜ' (ਪਾਣੀ ਉੱਤੇ ਵਸੇ ਪਿੰਡ) ਵਿਚ ਵਾਪਰਿਆ, ਜਿੱਥੇ ਲੱਕੜ ਦੇ ਬਣੇ ਘਰ ਖੰਭਿਆਂ ਦੇ ਸਹਾਰੇ ਖੜ੍ਹੇ ਹੁੰਦੇ ਹਨ। ਇਨ੍ਹਾਂ ਇਲਾਕਿਆਂ ਵਿਚ ਜ਼ਿਆਦਾਤਰ ਗਰੀਬ ਭਾਈਚਾਰੇ, ਆਦਿਵਾਸੀ ਅਤੇ ਬਿਨਾਂ ਨਾਗਰਿਕਤਾ ਵਾਲੇ ਲੋਕ ਰਹਿੰਦੇ ਹਨ। ਪੁਲਿਸ ਅਨੁਸਾਰ ਇਸ ਅੱਗ ਨਾਲ ਲਗਪਗ 9,000 ਤੋਂ ਵੱਧ ਲੋਕ ਪ੍ਰਭਾਵਿਤ ਹੋਏ ਹਨ, ਪਰ ਚੰਗੀ ਗੱਲ ਇਹ ਰਹੀ ਕਿ ਹਾਲੇ ਤੱਕ ਕਿਸੇ ਵੀ ਜਾਨੀ ਨੁਕਸਾਨ ਦੀ ਕੋਈ ਖ਼ਬਰ ਨਹੀਂ ਮਿਲੀ ਹੈ।

ਮਲੇਸ਼ੀਆ ਦੇ ਪ੍ਰਧਾਨ ਮੰਤਰੀ ਅਨਵਰ ਇਬਰਾਹਿਮ ਨੇ ਕਿਹਾ ਹੈ ਕਿ ਕੇਂਦਰੀ ਸਰਕਾਰ ਸਬਾਹ ਦੀਆਂ ਸਥਾਨਕ ਅਥਾਰਟੀਆਂ ਨਾਲ ਮਿਲ ਕੇ ਕੰਮ ਕਰ ਰਹੀ ਹੈ ਤਾਂ ਜੋ ਪੀੜਤਾਂ ਨੂੰ ਜ਼ਰੂਰੀ ਸਹਾਇਤਾ ਅਤੇ ਰਹਿਣ ਲਈ ਆਰਜ਼ੀ ਥਾਂ ਮੁਹੱਈਆ ਕਰਵਾਈ ਜਾ ਸਕੇ। ਉਨ੍ਹਾਂ ਨੇ ਸੋਸ਼ਲ ਮੀਡੀਆ ਰਾਹੀਂ ਭਰੋਸਾ ਦਿੱਤਾ ਕਿ ਇਸ ਸਮੇਂ ਸਰਕਾਰ ਦੀ ਸਭ ਤੋਂ ਵੱਡੀ ਤਰਜੀਹ ਲੋਕਾਂ ਦੀ ਸੁਰੱਖਿਆ ਅਤੇ ਉਨ੍ਹਾਂ ਨੂੰ ਤੁਰੰਤ ਮਦਦ ਪਹੁੰਚਾਉਣਾ ਹੈ।