ਸਮਰਾਲਾ ਨੇੜੇ ਰਿਵਾਲਵਰ ਦੀ ਬਰਾਮਦਗੀ ਮੌਕੇ ਲੁਟੇਰੇ ਦੇ ਲੱਗੀ ਗੋਲੀ

1 days ago

ਸਮਰਾਲਾ, (ਲੁਧਿਆਣਾ), 15 ਅਪ੍ਰੈਲ (ਗੋਪਾਲ ਸੋਫਤ)- ਅੱਜ ਤੜਕੇ ਸਥਾਨਕ ਬਾਈਪਾਸ ਦੇ ਨੇੜੇ ਬੰਦ ਪਏ ਇਕ ਇੱਟਾਂ ਦੇ ਭੱਠੇ ਨੇੜਿਓਂ ਪੰਜ ਦਿਨ ਪਹਿਲਾਂ ਪ੍ਰਵਾਸੀ ਮਜ਼ਦੂਰਾਂ ਤੋਂ ਮੋਟਰਸਾਈਕਲ ਖੋਹਣ ਅਤੇ ਉਸ ਦੇ ਗੋਲੀਆਂ ਮਾਰਨ ਵਾਲੇ ਲੁਟੇਰਿਆਂ ’ਚੋਂ ਇਕ ਦੇ ਅੱਜ ਉਸ ਸਮੇਂ ਪੈਰ ਵਿਚ ਗੋਲੀ ਲੱਗੀ ਹੈ, ਜਿਸ ਨੂੰ ਲੁੱਟ ਦੀ ਵਾਰਦਾਤ ਵਿਚ ਵਰਤੇ ਰਿਵਾਲਵਰ ਨੂੰ ਬਰਾਮਦ ਕਰਾਉਣ ਲਈ ਪੁਲਿਸ ਤੜਕੇ 3 ਵਜੇ ਭੱਠੇ ਦੇ ਕੋਲ ਲੈ ਕੇ ਆਈ ਸੀ। ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਐਸ. ਪੀ. (ਡੀ) ਪਵਨਜੀਤ ਸਿੰਘ ਨੇ ਦੱਸਿਆ ਕਿ ਮੋਟਰਸਾਈਕਲ ਸਵਾਰ ਦੋ ਅਣਪਛਾਤੇ ਲੁਟੇਰਿਆਂ ਨੇ ਪੰਜ ਦਿਨ ਪਹਿਲਾਂ ਸਮਰਾਲਾ ਨੇੜਲੇ ਪਿੰਡ ਦਿਆਲਪੁਰਾ ਦੇ ਨਜ਼ਦੀਕ ਤਿੰਨ ਪ੍ਰਵਾਸੀ ਮਜ਼ਦੂਰਾਂ ਵਿਚੋਂ ਇਕ ਨੂੰ ਗੋਲੀਆਂ ਮਾਰਨ ਉਪਰੰਤ ਮੋਟਰਸਾਈਕਲ ਖੋਹ ਕੇ ਫਰਾਰ ਹੋਏ ਸਨ। ਉਨ੍ਹਾਂ ਦੱਸਿਆ ਕਿ ਪੁਲਿਸ ਵਲੋਂ ਗ੍ਰਿਫ਼ਤਾਰ ਕੀਤੇ ਗਏ ਇਨ੍ਹਾਂ ਲੁਟੇਰਿਆਂ ਦੀ ਪੁੱਛਗਿਛ ਉਪਰੰਤ ਸਮਰਾਲਾ ਪੁਲਿਸ ਬਾਈਪਾਸ ’ਤੇ ਇਕ ਬੰਦ ਪਏ ਭੱਠੇ ਦੇ ਨਜ਼ਦੀਕ ਤੋਂ ਛੁਪਾਇਆ ਹੋਇਆ ਰਿਵਾਲਵਰ ਬਰਾਮਦ ਕਰਨ ਲਈ ਲੈ ਕੇ ਆਈ ਸੀ। ਰਿਵਾਲਵਰ ਬਰਾਮਦ ਕਰਾਉਣ ਵਾਲੇ ਸਤਨਾਮ ਸਿੰਘ ਨੇ ਸਮਰਾਲਾ ਦੇ ਥਾਣਾ ਮੁਖੀ ਪਵਿੱਤਰ ਸਿੰਘ ਤੋਂ ਬਰਾਮਦ ਰਿਵਾਲਵਰ ਖੋਹਣ ਦੀ ਕੋਸ਼ਿਸ਼ ਕੀਤੀ, ਜਿਸ ਦੌਰਾਨ ਉਸ ਦੇ ਪੈਰ ਵਿਚ ਗੋਲੀ ਲੱਗ ਗਈ ਅਤੇ ਐਸ.ਐਚ.ਓ. ਪਵਿੱਤਰ ਸਿੰਘ ਦੇ ਵੀ ਸੱਟਾਂ ਲੱਗੀਆਂ ਹਨ। ਜ਼ਖਮੀ ਹੋਏ ਲੁਟੇਰੇ ਨੂੰ ਇਲਾਜ ਲਈ ਸਿਵਲ ਹਸਪਤਾਲ ਸਮਰਾਲਾ ਭੇਜਿਆ ਗਿਆ ਹੈ। ਸਮਰਾਲਾ ਪੁਲਿਸ ਨਾਲ ਹੋਈ ਇਸ ਮੁੱਠਭੇੜ ਦੀ ਘਟਨਾ ਤੋਂ ਬਾਅਦ ਐਸ.ਐਸ.ਪੀ. ਖੰਨਾ ਡਾ. ਜੋਤੀ ਯਾਦਵ ਸਮੇਤ ਹੋਰ ਪੁਲਿਸ ਅਧਿਕਾਰੀ ਵੀ ਮੌਕੇ ’ਤੇ ਪਹੁੰਚ ਗਏ ਹਨ।