ਮੈਕਸੀਕੋ: ਪਟੜੀ ਤੋਂ ਉਤਰੀ ਰੇਲਗੱਡੀ, 13 ਲੋਕਾਂ ਦੀ ਮੌਤ

ਮੈਕਸੀਕੋ ਸ਼ਹਿਰ, 29 ਦਸੰਬਰ- ਦੱਖਣੀ ਮੈਕਸੀਕਨ ਰਾਜ ਓਆਕਸਾਕਾ ਵਿਚ ਇਕ ਰੇਲਗੱਡੀ ਪਟੜੀ ਤੋਂ ਉਤਰ ਗਈ, ਜਿਸ ਕਾਰਨ ਰੇਲਗੱਡੀ ਦਾ ਇੰਜਣ ਪਲਟ ਗਿਆ ਤੇ ਨਾਲ ਹੀ ਕਈ ਡੱਬੇ ਵੀ ਪਲਟ ਗਏ। ਇਸ ਵਿਚ 13 ਲੋਕਾਂ ਦੀ ਮੌਤ ਹੋ ਗਈ ਅਤੇ 98 ਜ਼ਖਮੀ ਹੋ ਗਏ। ਰੇਲਗੱਡੀ ਮੈਕਸੀਕੋ ਦੀ ਖਾੜੀ ਅਤੇ ਪ੍ਰਸ਼ਾਂਤ ਮਹਾਸਾਗਰ ਨੂੰ ਜੋੜਨ ਵਾਲੀ ਇਕ ਨਵੀਂ ਰੇਲਵੇ ਲਾਈਨ 'ਤੇ ਜਾ ਰਹੀ ਸੀ। ਇਹ ਰੇਲਵੇ ਲਾਈਨ ਮੈਕਸੀਕਨ ਜਲ ਸੈਨਾ ਦੁਆਰਾ ਚਲਾਈ ਜਾਂਦੀ ਹੈ।

ਮੈਕਸੀਕਨ ਜਲ ਸੈਨਾ ਦੇ ਅਨੁਸਾਰ ਰੇਲਗੱਡੀ ਵਿਚ 250 ਲੋਕ ਸਵਾਰ ਸਨ, ਜਿਨ੍ਹਾਂ ਵਿਚ ਨੌਂ ਚਾਲਕ ਦਲ ਦੇ ਮੈਂਬਰ ਵੀ ਸ਼ਾਮਿਲ ਸਨ। ਇਹ ਹਾਦਸਾ ਚਿਵੇਲਾ ਅਤੇ ਨਿਜੰਡਾ ਕਸਬਿਆਂ ਦੇ ਵਿਚਕਾਰ ਇਕ ਮੋੜ 'ਤੇ ਵਾਪਰਿਆ।

ਜ਼ਖਮੀਆਂ ਵਿਚੋਂ ਕਈਆਂ ਦਾ ਹਸਪਤਾਲ ਵਿਚ ਇਲਾਜ ਚੱਲ ਰਿਹਾ ਹੈ। ਰਾਸ਼ਟਰਪਤੀ ਕਲਾਉਡੀਆ ਸ਼ੀਨਬੌਮ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ 'ਤੇ ਕਿਹਾ ਕਿ ਪੰਜ ਦੀ ਹਾਲਤ ਗੰਭੀਰ ਹੈ। ਉਨ੍ਹਾਂ ਨੇ ਮ੍ਰਿਤਕਾਂ ਦੇ ਪਰਿਵਾਰਾਂ ਦੀ ਸਹਾਇਤਾ ਲਈ ਸੀਨੀਅਰ ਅਧਿਕਾਰੀਆਂ ਨੂੰ ਘਟਨਾ ਸਥਾਨ 'ਤੇ ਜਾਣ ਦੇ ਨਿਰਦੇਸ਼ ਦਿੱਤੇ ਹਨ।