ਭਾਰਤ ਦਾ ਬਾਹੁਬਲੀ ਰਾਕੇਟ ਐਲ.ਵੀ.ਐਮ. 3-ਐਮ. 6 ਲਾਂਚ

ਅਮਰਾਵਤੀ, 24 ਦਸੰਬਰ- ਭਾਰਤ ਦਾ ਸਭ ਤੋਂ ਭਾਰੀ ‘ਬਾਹੂਬਲੀ’ ਰਾਕੇਟ ਐਲ.ਵੀ.ਐਮ. 3-ਐਮ. 6 (ਲਾਂਚ ਵਹੀਕਲ ਮਾਰਕ 3-M6) ਅੱਜ ਸਵੇਰੇ ਆਂਧਰਾ ਪ੍ਰਦੇਸ਼ ਦੇ ਸ਼੍ਰੀਹਰੀਕੋਟਾ ਦੇ ਸਤੀਸ਼ ਧਵਨ ਸਪੇਸ ਸੈਂਟਰ ਤੋਂ ਲਾਂਚ ਹੋਣ ਲਈ ਤਿਆਰ ਹੈ। ਰਾਕੇਟ ਅਸਲ ਵਿਚ ਸ਼੍ਰੀਹਰੀਕੋਟਾ ਤੋਂ ਸਵੇਰੇ 8:55:30 ਵਜੇ ਲਾਂਚ ਕੀਤਾ ਗਿਆ ਹੈ।

ਇਸਰੋ ਦੇ ਅਨੁਸਾਰ ਹਜ਼ਾਰਾਂ ਸਰਗਰਮ ਉਪਗ੍ਰਹਿ ਸ਼੍ਰੀਹਰੀਕੋਟਾ ਪੁਲਾੜ ਖੇਤਰ ਦੇ ਉੱਪਰੋਂ ਲਗਾਤਾਰ ਲੰਘ ਰਹੇ ਹਨ ਤੇ ਉਡਾਣ ਦੇ ਰਸਤੇ 'ਤੇ ਮਲਬੇ ਜਾਂ ਹੋਰ ਉਪਗ੍ਰਹਿਆਂ ਨਾਲ ਟਕਰਾਉਣ ਦੇ ਜ਼ੋਖ਼ਮ ਦੇ ਕਾਰਨ ਮਿਸ਼ਨ ਦਾ ਲਾਂਚ ਸਮਾਂ 90 ਸਕਿੰਟ ਵਧਾ ਦਿੱਤਾ ਗਿਆ। ਇਹ ਮਿਸ਼ਨ ਇਸਰੋ ਅਤੇ ਅਮਰੀਕੀ ਕੰਪਨੀ ਸਪੇਸਮੋਬਾਈਲ ਵਿਚਕਾਰ ਇਕ ਵਪਾਰਕ ਸਮਝੌਤੇ ਦਾ ਹਿੱਸਾ ਹੈ। ਇਸ ਸਮਝੌਤੇ ਦੇ ਤਹਿਤ ਇਸਰੋ ਰਾਕੇਟ ਦੀ ਵਰਤੋਂ ਕਰਕੇ ਬਲੂਬਰਡ ਬਲਾਕ-2 ਸੈਟੇਲਾਈਟ ਨੂੰ ਲੋ-ਅਰਥ ਔਰਬਿਟ ਵਿਚ ਲਾਂਚ ਕਰੇਗਾ। ਇਹ ਇਕ ਅਗਲੀ ਪੀੜ੍ਹੀ ਦਾ ਸੰਚਾਰ ਉਪਗ੍ਰਹਿ ਹੈ ਜੋ ਦੁਨੀਆ ਭਰ ਦੇ ਸਮਾਰਟਫੋਨਾਂ ਨੂੰ ਸਿੱਧੇ ਹਾਈ-ਸਪੀਡ ਸੈਲੂਲਰ ਬ੍ਰਾਡਬੈਂਡ ਸੇਵਾ ਪ੍ਰਦਾਨ ਕਰਨ ਲਈ ਤਿਆਰ ਕੀਤਾ ਗਿਆ ਹੈ।

ਇਸ ਨਾਲ 4ਜੀ ਅਤੇ 5ਜੀ ਵੌਇਸ ਕਾਲਾਂ, ਵੀਡੀਓ ਕਾਲਾਂ, ਮੈਸੇਜਿੰਗ ਅਤੇ ਡਾਟਾ ਸੇਵਾਵਾਂ ਦੁਨੀਆ ਵਿਚ ਕਿਤੇ ਵੀ ਉਪਲਬਧ ਕਰਵਾਈਆਂ ਜਾ ਸਕਣਗੀਆਂ। ਕਿਸੇ ਵੀ ਸਮਾਰਟਫੋਨ ਦੀ ਵਰਤੋਂ ਕਰਕੇ ਸਿੱਧੇ ਪੁਲਾੜ ਤੋਂ ਕਾਲਾਂ ਕੀਤੀਆਂ ਜਾ ਸਕਦੀਆਂ ਹਨ। ਹਾਲਾਂਕਿ ਵਰਤਮਾਨ ਵਿਚ ਜਹਾਜ਼ ਤੋਂ ਕਾਲਾਂ ਨਹੀਂ ਕੀਤੀਆਂ ਜਾ ਸਕਦੀਆਂ ਕਿਉਂਕਿ ਇਹ ਨੈਵੀਗੇਸ਼ਨ ਪ੍ਰਣਾਲੀਆਂ ਨੂੰ ਪ੍ਰਭਾਵਿਤ ਕਰਦਾ ਹੈ।